ຄົນດູແລເຝົ້າຫ້ອງແຖວສວຍໂອກາດລັກເຄື່ອງ ລວມມູນຄ່າຫຼາຍກວ່າ 200 ລ້ານ

ນາງ ສຸຈິນຕະນາ ຫຼື ໂມະ ອາຍຸ 50 ປີ ທີ່ເປັນຄົນດູແລເຝົ້າຫ້ອງແຖວໃຫ້ແມ່ ຢູ່ບ້ານທາດຫຼວງໃຕ້ ເມືອງໄຊເສດຖາ ນະ ຄອນຫຼວງວຽງຈັນ ໄດ້ຮ່ວມກັບລູກໄພ້ ສວຍໂອກາດຕອນຜູ້ເຊົ່າຫ້ອງແຖວກັບບ້ານໃນຊ່ວງພະຍາດໂຄວິດ-19 ລະບາດ, ໄຂປະຕູຫ້ອງລັກເອົາເຄື່ອງຂອງ ມີຄ່າໄປຂາຍ ແລະ ໃຊ້ເອງຈົນໝົດ ລວມມູນຄ່າເສຍຫາຍປະມານ 250 ລ້ານກີບ ໃນຊ່ວງເດືອນ ສິງຫາ 2020.

ເຈົ້າໜ້າທີ່ ປກສ ເມືອງໄຊເສດຖາ ໃຫ້ຮູ້ວ່າ: ໃນວັນທີ 6 ຕຸລາ 2020, ນາງ ຈຸທິດົງ ອາຍຸ 22 ປີ ສັນຊາດຫວຽດນາມ ພັກເຊົ່າຢູ່ຫ້ອງແຖວບ້ານທາດຫຼວງໃຕ້ ເມືອງໄຊເສດຖາ ໄດ້ເຂົ້າແຈ້ງຄວາມວ່າ: ເຄື່ອງຂອງປະເພດເສື້ອຜ້າຂອງຜູ້ກ່ຽວທີ່ຂາຍຢູ່ຕະຫຼາດຂົວດິນ,ເຊິ່ງເອົາມາເກັບໄວ້ຢູ່ໃນຫ້ອງແຖວ ໃນ ຊ່ວງເດືອນກຸມພາ 2020 ກ່ອນກັບຄືນປະເທດ.ແຕ່ເນື່ອງ ຈາກພະຍາດໂຄວິດ-19 ລະບາດ ຈຶ່ງບໍ່ສາມາດກັບມາລາວໄດ້. ຈົນລັດຖະບານ ໄດ້ມີນະໂຍບາຍໃຫ້ນັກທຸລະກິດ-ຄ້າຂາຍເດີນ ທາງໄດ້ ຈຶ່ງໄດ້ເດີນທາງກັບມາລາວ. ເມື່ອມາຮອດຫ້ອງແຖວ ແລະ ໄຂປະຕູເຂົ້າໄປໃນຫ້ອງແຖວ ເຫັນວ່າ ເຄື່ອງທີ່ເອົາມາເກັບໄວ້ ແມ່ນບໍ່ມີເລີຍລວມທັງເຄື່ອງໃຊ້ກໍບໍ່ເຫັນ.


ເຈົ້າໜ້າທີ່ວິຊາສະເພາະ ຈຶ່ງໄດ້ສົມທົບກັບພາກສ່ວນກ່ຽວ ຂ້ອງລົງກວດກາສະຖານທີ່ ແລະ ເກັບກຳຂໍ້ມູນຫຼັກຖານຢ່າງລະອຽດຖີຖ້ວນ ຈຶ່ງສືບຮູ້ວ່າ ຜູ້ກໍ່ເຫດແມ່ນ ນາງ ສຸຈິນຕະນາ ຫຼື ໂມະ ທີ່ເປັນຜູ້ເຝົ້າຫ້ອງແຖວຂອງແມ່, ມາຮອດວັນທີ 19 ຕຸລາ 2020 ຈຶ່ງກັກຕົວຜູ້ກ່ຽວມາສອບສວນ.
ຜ່ານການສອບສວນເບື້ອງຕົ້ນ, ນາງ ໂມະ ຮັບສາລະພາບວ່າ: ພາຍຫຼັງແມ່ໄດ້ສ້າງຫ້ອງແຖວ ຕິດກັບເຮືອນຂອງຕົນສຳ ເລັດໃນປີ 2018. ນາງ ຈຸ ທິດົງ ກັບຜົວ ໄດ້ເຂົ້າມາເຊົ່າຫ້ອງ ແລະ ຕົນເອງກໍເປັນຜູ້ດູແລ ແລະເກັບເງິນຄ່າຫ້ອງແຖວ. ຈົນຮອດເດືອນກຸມພາ 2020, ພະຍາດໂຄວິດ-19 ໄດ້ແພ່ລະ ບາດ. ຈາກນັ້ນ, ທັງ 2 ຜົວເມຍ ກໍໄດ້ຂົນເຄື່ອງທີ່ຂາຍຢູ່ຕະ ຫຼາດຂົວດິນມາເກັບໄວ້ຫ້ອງແຖວ ແລ້ວກັບຄືນປະເທດ ຫວຽດນາມ. ຈົນມາເດືອນສິງຫາ 2020, ຈຶ່ງເກີດມີແນວຄິດຢາກໄດ້ເຄື່ອງດັ່ງກ່າວໄປຂາຍ ແລະ ໄດ້ປຶກສາກັບ ນາງ ວັນ ຜູ້ເປັນລູກໄພ້ ຢູ່ບ້ານນາໄຫ ເມືອງຫາດຊາຍຟອງ ນະຄອນ ຫຼວງວຽງຈັນ ເພື່ອລັກເອົາເຄື່ອງໃນຫ້ອງແຖວໄປຂາຍ.

ຈາກນັ້ນ, ກໍຊອກຫາບ່ອນຂາຍແຕ່ກໍບໍ່ມີໃຜຊື້, ຕົນຈຶ່ງໄດ້ໂທລະສັບຫາ ນາງ ພອນ ຄົນເມືອງເຟືອງ ແຂວງວຽງຈັນ ທີ່ເຄີຍມາຢູ່ຫ້ອງແຖວ ເພື່ອໃຫ້ ນາງ ພອນ ຕິດຕໍ່ຫາບ່ອນຂາຍໃຫ້ ເມື່ອຕິດຕໍ່ຄົນມາຊື້ໄດ້ເເລ້ວ,ຕົນ ກັບ ນາງ ວັນ ໄດ້ຈ້າງລົດໃນລາຄາ 200.000 ກີບ ໃຫ້ມາຂົນເອົາເຄື່ອງດັ່ງກ່າວຈຳນວນ 10 ເປົາໃຫຍ່, ໂດຍນັດຈຸດຊື້ຂາຍຢູ່ເດີນທາດຫຼວງ ໃນລາຄາ 7.000.000 ກີບ. ຕໍ່ມາຕົນ, ກໍໄດ້ເຂົ້າໄປລັກເອົາເຄື່ອງອີກຄັ້ງ; ຄັ້ງນີ້, ມີເຄື່ອງໃຊ້ໄຟຟ້າປະເພດຕູ້ເຢັນສອງຊັ້ນ 1 ໜ່ວຍ, ພັດລົດຕັ້ງໂຕະ 1 ໜ່ວຍ ແລະ ຕູ້ນ້ຳເຢັນ 1 ໜ່ວຍ ແລ້ວເອົາມາໃຊ້ພາຍໃນຄອບຄົວ.
ປັດຈຸບັນຄະດີດັ່ງກ່າວ, ເຈົ້າໜ້າທີ່ເລັ່ງເກັບກູ້ເຄື່ອງຂອງກາງມາມອບຄືນໃຫ້ເຈົ້າຂອງເດີມ ແລະສືບຕໍ່ສະຫຼຸບສຳນວນ ຄະດີ ສົ່ງອົງການໄອຍະການປະຊາຊົນ ສັ່ງຟ້ອງສານຕັດສິນຕາມກົດໝາຍ.