ງັດເຂົ້າເຮືອນປະຊາຊົນລັກຊັບ 2 ຄັ້ງ ຂາຍໄດ້ເງິນຫຼາຍລ້ານ ຖືກຈັບດຳເນີນຄະດີ

ທ້າວ ບີ່ຢ່າງ ອາຍຸ 19 ປີ ຢູ່ບ້ານວັດທາດ ເມືອງບໍລິຄັນ ແຂວງບໍລິຄໍາໄຊ ໄດ້ກໍ່ເຫດລັກຊັບພົນລະເມືອງ 2 ຄັ້ງ ດ້ວຍຮູບການງັດເຂົ້າເຮືອນປະຊາຊົນ ຄົ້ນເອົາຊັບສິນມີຄ່າ ແລ້ວນຳໄປຂາຍເອົາເງິນມາໃຊ້ຈ່າຍຟຸມເຟືອຍ ລວມມູນຄ່າ 21.100.000 ກີບ. ກ່ອນຖືກເຈົ້າໜ້າທີ່ ຕິດຕາມກັກຕົວມາດຳເນີນຄະດີໃນວັນທີ 22 ຕຸລາ ທີ່ຜ່ານມາ.


ເຈົ້າໜ້າທີ່ໜ່ວຍງານສືບສວນ-ສອບສວນຄະດີອາຍາ ປກສ ເມືອງບໍລິຄັນ ເປີດເຜີຍວ່າ: ວັນທີ 19 ກັນຍາ 2020, ນາງ ເຕັ່ງລີ ອາຍຸ 52 ປີ ຢູ່ບ້ານວັດທາດ ເຂົ້າແຈ້ງຄວາມວ່າ ມີຄົນຮ້າຍງັດເຂົ້າເຮືອນ ລັກເອົາສາຍຄໍຄໍາ 1 ເສັ້ນ ໜັກ 2 ບາດ, ສາຍແຂນເງິນ 1 ວົງ, ເງິນຂັນ 2 ຂັນ, ເງິນ 300.000 ກີບ ແລະ ປຶ້ມເງິນຝາກທະນາຄານ 5 ຫົວ ທີ່ເກັບຮັກສາໄວ້ໃນຫ້ອງນອນ ແລະ ໃນວັນທີ 19 ຕຸລາ 2020 ທ້າວ ເນັ່ງຈື່ຢ່າງ ອາຍຸ 51 ປີ ຢູ່ບ້ານສີສະຫວາດ ເມືອງບໍລິຄັນ ເຂົ້າມາແຈ້ງ ຄວາມວ່າ ມີຄົນຮ້າຍງັດເຂົ້າເຮືອນ ແລ້ວລັກເອົາສາຍຄໍຄຳ ໜັກ2 ບາດ, ເງິນຂັນຈຳນວນ 10 ຂັນ, ເງິນບີ້ 13 ບີ້, ເງິນ 600.000 ກີບ. ຈາກນັ້ນ, ເຈົ້າໜ້າທີ່ ຈຶ່ງໄດ້ລົງເກັບກຳຂໍ້ມູນ ທັງ 2 ເຫດການ ພົບວ່າ ຄົນຮ້າຍທີ່ກໍ່ເຫດໃນລັກສະນະຄ້າຍຄືກັນ ຈຶ່ງໄດ້ຂຶ້ນບັນຊີເປົ້າໝາຍ. ມາຮອດວັນທີ 22 ຕຸລາ ຜ່ານມາ,ກໍສາມາດຈັບຕົວຜູ້ກໍ່ເຫດໄດ້ ຊື່: ທ້າວ ບີ່ຢ່າງ ໄປດຳເນີນ ຄະດີ

ທ້າວ ບີ່ຢ່າງ ສາລະພາບວ່າ: ໄດ້ກໍ່ເຫດລັດເຂົ້າເຮືອນຂອງ ນາງ ເຕັ່ງລີ່ ແລະ ທ້າວ ເນັ່ງຈື້ຢ່າງ ແທ້,ໂດຍໃນວັນທີ 18 ກັນ ຍາ, ໄດ້ເລາະຊອກລັກເຄື່ອງຢູ່ພາຍໃນບ້ານວັດທາດ. ພໍຮອດເຮືອນນາງ ເຕັ່ງລີ ເຫັນວ່າບໍ່ມີຄົນຢູ່ ຈຶ່ງໄດ້ງັດເຂົ້າເຮືອນ ຄົ້ນເອົາຊັບສິນໃນຫ້ອງນອນ ໄດ້ສາຍຄໍຄຳ 1 ເສັ້ນພ້ອມດ້ວຍກີ້, ເງິນຂັນ 2 ຂັນ, ສາຍແຂນເງິນ 1 ເສັ້ນ,ເງິນ 300.000 ກີບ, ປຶ້ມບັນຊີຝາກເງິນທະນາຄານ 5 ຫົວ ແລະ ມາວັນທີ 19 ກັນ ຍາ, ກໍໄດ້ເອົາເຄື່ອງທີ່ລັກມານັ້ນ ໄປຂາຍໃຫ້ແມ່ຄ້າທີ່ຂາຍເສື້ອຜ້າຢູ່ຕະຫຼາດປາກຊັນອິນດູຈີນ ເມືອງບໍລິຄັນ ໄດ້ເງິນ 9.200.000 ກີບ, ສ່ວນປຶ້ມບັນຊີເງິນຝາກທະນາຄານນັ້ນໄດ້ເອົາເຊື່ອງໄວ້ເຮືອນ.


ໃນວັນທີ 18 ຕຸລາ 2020, ໄດ້ອອກເລາະຊອກລັກເຄື່ອງຕື່ມອີກ,ເມື່ອຍ່າງມາຮອດເຂດເຮືອນຂອງ ທ້າວ ເນັ່ງຈື່ຢ່າງ ເຫັນ ວ່າ ບໍ່ມີຄົນຢູ່ເຮືອນ ຈຶ່ງລັກເຂົ້າເຮືອນ ແລ້ວຄົ້ນເອົາຊັບສິນຢູ່ໃນຫ້ອງນອນ ເຫັນຖົງດຳທີ່ຫຸ້ມຫໍ່ຂອງມີຄ່າ ລວມມີສາຍຄໍຄໍາ, ເງິນບີ້, ເງິນຂັນ, ໂທລະສັບ ແລະ ເງິນ600.000 ກີບ. ພໍ ໄດ້ເຄື່ອງທີ່ມີຄ່າດັ່ງກ່າວແລ້ວ ກໍ ນຳເອົາເຄື່ອງໄປຊຸກເຊື່ອງໄວ້ປ່າແຄມທາງ. ມາວັນທີ 20 ຕຸລາ,ກໍເອົາເຄື່ອງທີ່ຊຸກເຊື່ອງໄວ້ນັ້ນ ໄປຂາຍໃຫ້ຮ້ານຂາຍເຄື່ອງ ທີ່ເຄີຍເອົາໄປຂາຍໃຫ້ໃນຄັ້ງກ່ອນ ໄດ້ເງິນ 11.000.000 ກີບ, ເງິນທີ່ໄດ້ມາຈາກການລັກຊັບ ແມ່ນໄດ້ໃຊ້ຈ່າຍຄົນດຽວໝົດ ລວມມູນຄ່າ 21.100.00 ກີບ.
ຂອງກາງຄະດີນັ້ນ, ເຈົ້າໜ້າທີ່ ໄດ້ຕິດຕາມນຳເກັບກູ້ຄືນມາແລ້ວ, ສ່ວນຄຳຮູບປະພັນ ແມ່ນໃຊ້ແທນເປັນເງິນ ແລະ ໄດ້ມອບຊັບຄືນໃຫ້ເຈົ້າຂອງເດີມແລ້ວ.