ມະລິເຄືອ ຢາດີແກ້ໄອ ແລະ ຮັກສາພະຍາດຜິວໜັງ

ບັນຍາຍລັກສະນະພືດສາດ
ຈັດເປັນພືດລົ້ມລຸກ. ລຳຕົ້ນເປັນລຳເລືອໄປຕາມໜ້າດິນ, ມີຂໍ້, ບໍ່ມີປ້ອງ, ຮາກອອກຕາມຂໍ້, ສູງໄດ້ປະມານ 15 ຊມ, ມີຂົນອ່ອນນຸ້ມກະຈາຍຢ່າງໜາແໜ້ນ. ໃບດ່ຽວ, ອອກຮຽງກົງກັນຂ້າມສອງແຜ່ນພຽງສະຫຼັບຕັ້ງສາກ, ຮູບໄຂ່ກ້ວາງ ຫຼື ຮູບເກືອບກົມ, ມີເສັ້ນຜ່າສູນກາງປະມານ 1-3 ຊມ, ໂຄນໃບຮູບຫົວໃຈ, ຂອບລຽບ, ປາຍມົນ. ກ້ານໃບຍາວ 1-5 ຊມ, ມີຂົນ. ຫູໃບຮູບສາມຫຼຽ່ມ,ຕິດທົນ. ຊໍ່ດອກແບບກະຈຸກແໜ້ນ, ອອກຕາມປາຍຍອດ, ກ້ານຊໍ່ດອກຍາວ 1-4 ຊມ.

ໃບປະດັບຮູບເສັ້ນດ້າຍ, ຍາວ 1.5-3 ມມ. ດອກຍ່ອຍຮູບແກ, ມີ 1-3 ດອກ. ກາບດອກເຊື່ອມຕິດກັນເປັນຫຼອດ, ຍາວ 1.5-3 ມມ, ປາຍແຍກອອກເປັນ 4 ແສກ, ຮູບຫອກ, ຍາວ 2-3 ມມ, ຂອບມີຂົນຂຸຍ. ກີບດອກເຊື່ອມຕິດກັນເປັນຫຼອດ, ຍາວປະມານ 8 ມມ, ປາຍແຍກເປັນ 4 ກີບ, ຮູບຫອກ, ຍາວ 3-4 ມມ, ດ້ານໃນມີຂົນ. ເກສອນເພດຜູ້ມີ 4 ອັນ, ຕິດຢູ່ໃນຫຼອດກີບດອກ, ຖົງລະອອງຕິດດ້ານຫຼັງ. ເຕົ້າໄຂ່ຈັບລຸ່ມ, ມີ 2 ຫ້ອງ, ແຕ່ລະຫ້ອງມີ 1 ເມັດໄຂ່, ປາຍຮວງຮັບມີແຂ້ວເປັນ 2 ພູ. ໝາກຮູບກົມ, ມີເສັ້ນຜ່າສູນກາງ 4-6 ມມ, ໝາກສຸກສີແດງສົ້ມ. ແກ່ນມີ 2 ແກ່ນ, ຮູບຮີ, ຜິວຫ່ຽວ, ສີນ້ຳຕານ.

ບັນຍາຍການນຳໃຊ້
ອາຫານ: ໝາກສຸກກິນໄດ້.

ສັບພະຄຸນ: ໃບ ຍ້ຳກິນເປັນຢາແກ້ໄອ. ທັງຕົ້ນຕົ້ົົົົົມກັບນ້ຳດື່ມແກ້ອາການໄອ ແລະ ຂັບປັດສະວະ. ໝາກ: ມີສານຕ້ານເຊື້ອ ແລະ ຮັກສາພະຍາດຜິວໜັງ ໂດຍນຳເອົາມາບົດໃຫ້ລະອຽດແລ້ວທາບ່ອນທີ່ອັບເສບຕາມຜິວໜັງ ຫຼື ໃບໜ້າ.

ໄມ້ປະດັບ: ນິຍົມນຳມາປູກເປັນໄມ້ປະດັບ