ກຳລັງສຳຫຼວດ ແລະ ກໍ່ສ້າງເຂື່ອນໄຟຟ້າອີກ 22 ແຫຼ່ງ ຢູ່ໄຊຍະບູລີ

ໃນໂອກາດລາຍງານການຈັດຕັ້ງປະຕິບັດແຜນພັດທະນາວຽກງານພະລັງງານ ແລະ ບໍ່ແຮ່ ປະຈຳປີ 2020 ແລະ ວາງທິດທາງແຜນການປະຈຳປີ 2021 ທ່ານ ຄຳເຫຼັກ ແກ້ວວິໄລພອນ ກຳມະການພັກແຂວງ, ເລຂາຄະນະພັກຮາກຖານ, ຫົວໜ້າພະແນກພະລັງງານ ແລະບໍ່ແຮ່ ແຂວງໄຊຍະບູລີ ກ່າວວ່າ: ປະຈຸບັນພະແນກພະລັງ ງານ ແລະບໍ່ແຮ່ ປະກອບມີ 07 ຂະແໜງການ ແລະມີຫ້ອງການພະລັງງານ ແລະບໍ່ແຮ່ ປະຈຳ 11 ເມືອງ; ມີຈໍານວນພະນັກງານ-ລັດຖະກອນທັງໝົດ 68 ຄົນ, ຍິງ 11 ຄົນ. ໃນນັ້ນສັງກັດຢູ່ພະແນກ 30 ຄົນ, ຍິງ 08 ຄົນ ແລະຂັ້ນເມືອງ 38 ຄົນ, ຍິງ 3 ຄົນ; ທ່ານກ່າວຕື່ມວ່າ: ຄະນະພັກ, ຄະນະພະແນກໄດ້ເອົາໃຈໃສ່ຄຸ້ມ ຄອງ, ຊຸກຍູ້ຕິດຕາມ, ກວດກາ ແລະອໍານວຍຄວາມສະດວກຕໍ່ກັບການພັດທະນາໂຄງການແຫຼ່ງຜະລິດໄຟຟ້າທີ່ຂັ້ນສູນກາງ ແລະຂັ້ນແຂວງອະນຸຍາດຢ່າງເປັນປົກກະ ຕິ. ຮອດປະຈຸບັນມີໂຄງການລົງທຶນສຳຫຼວດ ແລະກໍ່ສ້າງແຫຼ່ງຜະລິດໄຟຟ້າພາຍໃນແຂວງທັງໝົດ 22 ໂຄງການລວມຄາດຄະເນກໍາລັງຕິດຕັ້ງ 6.867,2 MW ໃນນີ້, ຂັ້ນສູນກາງອະນຸຍາດ ມີ 9 ໂຄງການມີກໍາລັງຕິດຕັ້ງ 6.794 MW ແລະຂັ້ນແຂວງອະນຸຍາດມີ 13 ໂຄງການມີກໍາລັງຕິດຕັ້ງ 73.2 MW.

 

ໃນນັ້ນ, ໄດ້ດຳເນີນການຜະລິດ 2 ໂຄງການ, ສາມາດຜະລິດກະແສໄຟຟ້າໄດ້ທັງໝົດ 14.471,11 GWHS; ກຳລັງດຳເນີນການກໍ່ສ້າງ 1 ໂຄງການກຳລັງຕິດຕັ້ງ 15 ເມກາວັດ, ຄວາມຄືບໜ້າການກໍ່ສ້າງປະມານ 78%, ກະກຽມກໍ່ສ້າງ ແລະພວມສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກ 16 ໂຄງການ, ຄາດ ຄະເນກຳລັງຕິດຕັ້ງ 3.689,2 ເມກາວັດ; ໄດ້ຍົກເລີກໂຄງການສຶກສາຄວາມເປັນໄປໄດ້ 3 ໂຄງການ ຍ້ອນວ່າຜົນການສຶກສາ-ສຳຫຼວດເບື້ອງຕົ້ນເຫັນວ່າບໍ່ມີປະສິດທິຜົນທາງດ້ານເສດຖະກິດຄື: ໂຄງການເຂື່ອນໄຟຟ້ານໍ້າປຸຍ 1 ເມືອງພຽງ ມີກຳລັງຕິດຕັ້ງ 50 MW, ໂຄງການເຂື່ອນໄຟຟ້ານໍ້າແມດ 2 ເມືອງຫົງສາ ກຳລັງຕິດຕັ້ງ 5 MW ແລະໂຄງການເຂື່ອນໄຟຟ້ານໍ້າກູດ ເມືອງໄຊສະຖານ ມີກໍາລັງຕິດຕັ້ງ 8 MW ແລະກະກຽມສະເໜີຍົກເລີກ 2 ໂຄງການ.

 

ໄດ້ເອົາໃຈໃສ່ຄຸ້ມຄອງ ແລະຂະຫຍາຍລະບົບສາຍສົ່ງ ແລະສະຖານີໄຟຟ້າພາຍໃນແຂວງເຮັດໃຫ້ລະບົບສົ່ງ-ຈໍາໜ່າຍໄຟຟ້າມີຄວາມສະຖຽນລະພາບ ແລະປອດໄພຫຼາຍຂຶ້ນ. ປະຈຸບັນມີສະຖານີໄຟຟ້າ 115/34,5/22 kV 05 ແຫ່ງ, ທຽບໃສ່ປີຜ່ານມາເພີ່ມຂຶ້ນ 2 ແຫ່ງ, ຢຸດການນຳໃຊ້ 1 ແຫ່ງ ( ສະຖານີບ້ານວຽງແກ້ວ ເມືອງຫົງສາ); ມີລະບົບສາຍສົ່ງໄຟຟ້າແຮງສູງ 115 kV ຍາວ 488,39 km ທຽບໃສ່ປີຜ່ານມາຫຼຸດລົງ 98,03 km ຍ້ອນໄດ້ມອບຄືນການຄຸ້ມຄອງໃຫ້ພະແນກລະ ບົບສົ່ງພາກເໜືອ1 ແລວຄື ແລວສາຍສົ່ງຫົງສາ-ຊຽງເງິນ; ມີແຮງກາງ 22 kV ຍາວ 2.176,381 km ທຽບໃສ່ປີຜ່ານມາເພີ່ມຂຶ້ນ 20,6 km;ມີຕາຂ່າຍແຮງຕ່ຳ 0,4 kV ຍາວ 1.131,121 km ທຽບໃສ່ປີຜ່ານມາເພີ່ມຂຶ້ນ 5,88 km; ມີໝໍ້ແປງ 1.663 ໜ່ວຍ ມີກຳລັງຕິດຕັ້ງທັງໝົດ 199.210 kVA ທຽບໃສ່ປີຜ່ານມາເພີ່ມຂຶ້ນ 36 ໜ່ວຍ.

ຈາກການເອົາໃຈໃສ່ພັດທະນາ ແລະຂະຫຍາຍຕາຂ່າຍໄຟຟ້າດັ່ງກ່າວນັ້ນໄດ້ເຮັດໃຫ້ອັດຕາການຊົມໃຊ້ໄຟຟ້າເພີ່ມຂຶ້ນເປັນກ້າວໆມາ. ຮອດປີ 2020 ທົ່ວແຂວງໄດ້ຊົມໃຊ້ໄຟຟ້າແລ້ວ 429 ບ້ານ ກວມເອົາ 100% ຂອງຈຳນວນບ້ານທັງໝົດ, ມີ 77.642 ຄອບຄົວ ເທົ່າກັບ 98,40%, ທຽບໃສ່ໄລຍະດຽວກັນຂອງປີຜ່ານມາເພີ່ມ ຂຶ້ນ 891 ຄອບຄົວ ເທົ່າກັບ 1,14%, ໃນນີ້ບ້ານທີ່ໃຊ້ໄຟຟ້າໃນລະບົບຂອງໄຟ ຟ້າລາວ 423 ບ້ານ ເທົ່າກັບ 98,61% ທຽບໃສ່ປີຜ່ານມາເຫັນວ່າຈຳນວນບ້ານ ຫຼຸດລົງ 2 ບ້ານ ຍ້ອນມີການໂຮມບ້ານເຂົ້າກັນ, ມີ 77.313 ຄອບຄົວ ເທົ່າກັບ 97,98%, ທຽບໃສ່ປີຜ່ານມາເພີ່ມຂຶ້ນ 891 ຄອບຄົວ ເທົ່າກັບ 1,14%. ນອກ ຈາກນີ້ຍັງໄດ້ຊົມໃຊ້ໄຟຟ້ານອກລະບົບ (ໄຟຟ້າແສງຕາເວັນ, ໄຟຟ້າພະລັງງານນໍ້າຂະໜາດນ້ອຍ) 6 ບ້ານ ເທົ່າກັບ 1,39% ຂອງບ້ານທົ່ວແຂວງ, ມີ 329 ຄອບຄົວ ເທົ່າກັບ 0,42% ຂອງຄອບຄົວທົ່ວແຂວງ.

 

ກອງ​ປະ​ຊຸມ​ດັ່ງ​ກ່າວ​ໄດ້​ຈັດ​ຂຶ້ນ​ຢ່າງ​ເປັນ​ທາງ​ການ​ໃນ​ວັນ​ທີ 1 ເມ​ສາ 2021 ຢູ່​ຫ້ອງ​ປະ​ຊຸມ​ໃຫຍ່​ຂອງ​ແຂວງໂດຍ​ໃຫ້​ກຽດ​ເຂົ້າ​ຮ່ວມ​ຂອງ ທ່ານ ພົງ​ສະ​ຫວັນ ສິດ​ທະ​ວົງ ກຳ​ມະ​ການ​ສູນ​ກາງພັກ, ເລ​ຂາ​ພັກ​ແຂວງ, ເຈົ້າ​ແຂວງໆໄຊ​ຍະບູ​ລີ, ມີທ່ານ ກອນ​ທອງ ພູ​ນິ​ຄົມ ຮອ​ງ​ຫົວ​ໜ້າ​ຫ້ອງ​ການ​ກະ​ຊວງພະ​ລັງ​ງານ ແລະບໍ່​ແຮ່, ມີ​ຜ​ູ້​ຕາງ​ໜ້າ​ຈາກ​ພະ​ແນກ​ການ​ອ້ອມ​ຂ້າງ​ແຂວງ, ພ້ອມ​ດ້ວຍ​ພະ​ນັກ​ງານ​ພາຍ​ໃນ​ພະ​ແນກພະ​ລັງ​ງານ ແລະບໍ່​ແຮ່ແຂວງເຂົ້າ​ຮ່ວມ.

********

ຂ່າວ: ເສດຖະກິດ-ສັງຄົມ