ນາຍົກ ໃຫ້ທິດຊີ້ນໍາຫຼາຍກະຊວງຢ່າງຊັດເຈນ

ໃນຜົນກອງປະຊຸມຄັ້ງປະຖົມມະລຶກ ຂອງລັດຖະບານຊຸດທີ IX ຍັງໄດ້ລະບຸວ່າ ທ່ານ ພັນຄໍາວິພາວັນ ນາຍົກລັດຖະມົນຕີ ໃນນາມເປັນປະທານກອງປະຊຸມໃຫ້ຫຼາຍກະຊວງ ແລະອົງກອນສືບຕໍ່ບົດບາດ ແລະໜ້າທີ່ຂອງຕົນເອງ ພ້ອມທັງມີທິດຊີ້ນໍາຢ່າງເປັນລະບົບ ເຊິ່ງສາມາດສະຫຼຸບໄດ້ດັ່ງນີ້:
ທ່ານນາຍົກເນັ້ນໃຫ້ຄະນະສະເພາະກິດຕອບໂຕ້ໂຄວິດ-19 ຖະແຫລງຂ່າວ ໃຫ້ສັງຄົມຮັບຊາບຕື່ມ ເຖິງຄວາມອັນຕະລາຍຂອງໂຄວິດ-19 ແລະເຜີຍແຜ່ແຜນສັກຢາວັກຊີນໃຫ້ຊັດເຈນ.
ພ້ອມດຽວກັນທ່ານນາຍົກຍັງໄດ້ມີທິດຊີນໍາ ແລະໃຫ້ເອົາໃຈໃສ່ວຽກງານຈຸດສຸມປະຈຳເດືອນເມສາ 2021 ຄື:

ໜຶ່ງ, ໃຫ້ກະຊວງ ປກສ ແລະປກຊ ສະກັດກັ້ນປະກົດການຫຍໍ້ທໍ້ຕ່າງໆ, ແກ້ໄຂ ແລະ ຈຳກັດສະພາບການນໍາໃຊ້ສື່ສັງຄົມອອນລາຍ ທີ່ເຄື່ອນໄຫວໂຄສະນາບິດເບືອນຄວາມເປັນຈິງຫລຸດລົງ.
ສອງ, ໃຫ້ກະຊວງການຕ່າງປະເທດ ວິເຄາະວິໄຈເລິກເຊິ່ງ ກ່ຽວກັບຄວາມສ່ຽງ ແລະ ທ່າອ່ຽງຜົນກະທົບທາງດ້ານການເມືອງ, ເສດ ຖະກິດ ແລະ ສັງຄົມຕໍ່ປະເທດເຮົາ ເພື່ອຮັບມືທີ່ເປັນລະບົບ.
ສາມ, ກະຊວງພາຍໃນຮີບຮ້ອນມອບໂອນກົງຈັກ, ພະນັກງານ ແລະວຽກງານໃຫ້ຂະແໜງການກ່ຽວຂ້ອງ ຕາມການຕົກລົງຂອງຄະນະເລຂາທິການສູນກາງພັກ ທັງກະກຽມພາລະບົດບາດສິດໜ້າທີ່ຂອງແຕ່ລະກະຊວງ-ອົງການ.
ສີ່, ໃຫ້ກະຊວງແຜນການ ແລະການລົງທຶນສືບຕໍ່ ແລະຮີບຮ້ອນປັບປຸງແກ້ໄຂນິຕິກຳ, ກົນໄກ ທີ່ຕິດພັນກັບບັນຫາສິ່ງກີດຂວາງຕ່າງໆເພື່ອສ້າງເງື່ອນໄຂສະດວກໃຫ້ແກ່ນັກລົງທຶນ ແລະ ຍົກສູງປະສິດທິພາບການບໍລິການປະຕູດຽວໃຫ້ມີປະສິດທິຜົນ. ພ້ອມທັງປັບປຸງ 8 ມາດຕະການຊຸກຍູ້ເສດຖະກິດເພື່ອກະຕຸກຊຸກຍູ້ການສ້າງຖານລາຍຮັບເພີ່ມຂຶ້ນ.

ຫ້າ, ໃຫ້ກະຊວງການເງິນສືບຕໍ່ຕິດຕາມ, ກວດກາ ແລະຈັດເກັບລາຍຮັບເຂົ້າງົບປະມານໃຫ້ຄົບຖ້ວນ ແລະທັນເວລາ.
ຫົກ, ໃຫ້ທະນາຄານ ແຫ່ງ ສປປ ລາວ ສືບຕໍ່ຄຸ້ມຄອງ ແລະ ຮັກສາສະຖຽນລະພາບດ້ານເງິນຕາ.
ເຈັດ, ໃຫ້ກະຊວງກະສິກໍາ ແລະປ່າໄມ້ ກະກຽມ ແລະ ຊຸກຍູ້ຂະບວນການຜະລິດລະດູແລ້ງ ແລະ ລະດູຝົນ, ພ້ອມທັງວາງແຜນຕ້ານໄພແລ້ງ ແລະໄພນໍ້າຖ້ວມ.
ແປດ, ໃຫ້ກະຊວງອຸດສາຫະກໍາ ແລະການຄ້າ ສືບຕໍ່ຕິດຕາມຊຸກຍູ້ສົ່ງເສີມທຸລະກິດຂະໜາດນ້ອຍ ແລະ ຂະໜາດກາງ (SMEs), ການອອກທະບຽນວິສາຫະກິດໃຫ້ວ່ອງໄວ, ຮັບປະກັນຫັນບັນດາຫົວໜ່ວຍທຸລະກິດເຂົ້າສູ່ລະບຽບ.
ເກົ້າ, ໃຫ້ກະຊວງໂຍທາທິການ ແລະ ຂົນສົ່ງ ຮີບຮ້ອນແກ້ໄຂບັນຫາອຸປະສັກໃນການຂົນສົ່ງ-ຈໍລະຈອນສິນຄ້າເພື່ອໃຫ້ມີຄວາມຄ່ອງຕົວດີຂຶ້ນ.

ສິບ, ໃຫ້ກະຊວງສຶກສາທິການ ແລະກິລາ ສືບຕໍ່ຊີ້ນຳຊຸກຍູ້ ແລະ ຕິດຕາມການກະກຽມສອບ ເສັງຈົບຊັ້ນ ແລະເລື່ອນຊັ້ນປະຈຳສົກຮຽນປີ 2020-2021 ໃຫ້ໄດ້ຕາມແຜນການ ແລະປະຕິບັດຕາມຄໍາແນະນໍາຂອງຄະນະສະເພາະກິດໃນການປ້ອງກັນພະຍາດໂຄວິດ-19 ຢ່າງເຂັ້ມງວດ.
ສິບເອັດ, ໃຫ້ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ສືບຕໍ່ໂຄສະນາສົ່ງເສີມການຮັກສາວັດທະນະທຳ ແລະ ຮີດຄອງປະເພນີອັນດີງາມຂອງຊາດ, ຄົ້ນຄ້ວາ ແລະ ສະເໜີລັດຖະບານ ປະກາດໃຊ້ເຄື່ອງນຸ່ງປະຈຳຊາດຢ່າງເປັນທາງການ.
ສິບສອງ, ໃຫ້ບັນດາຂະແໜງການ ແລະ ອົງການປົກຄອງທ້ອງຖິ່ນ ເພີ່ມທະວີການຊີ້ນໍາ-ນຳພາຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ປະຈໍາປີ 2021 ແລະ ແຜນງົບປະມານແຫ່ງລັດ ໃຫ້ເຂົ້າສູ່ລວງເລິກ ແລະ ມີປະສິດທິຜົນສູງ.

ຂໍ້ມູນ: ຂປລ