ຈີນຍອມຮັບຄັ້ງທຳອິດວັກຊີນປ້ອງກັນໂຄວິດມີປະສິດທິພາບຕ່ຳ

ສຳນັກຂ່າວຕ່າງປະເທດລາຍງານເມື່ອວັນທີ 11 ເມສາ 2021 ວ່າ ເຈົ້າຫນ້າທີ່ດ້ານສາທາລະນະສຸກລະດັບສູງຂອງຈີນເຜີຍໃນງານປະຊຸມສຳນາທີ່ເມືອງເຊິງຕູວ່າ ທາງການຈີນກຳລັງພິຈາລະນາໃຊ້ວັກຊີນໂຄວິດ-19 ທີ່ຜະລິດຈາກຫລາຍເທັກໂນໂລຢີ ເພື່ອແກ້ບັນຫາວັກຊີນທີ່ຈີນມີຢູ່ມີປະສິດທິພາບຄ່ອນຂ້າງຕ່ຳ

ຫນັງສື່ພິມ The Paper ຂອງຈີນລາຍງານໂດຍອ້າງຄຳເວົ້າຂອງ ເກົາຝູ ຜູ້ອຳນວຍການສູນຄວບຄຸມ ແລະປ້ອງກັນພະຍາດຂອງຈີນ (CDC) ວ່າ ທາງການຈີນຈຳເປັນຕ້ອງພິຈາລະນາຫົນທາງແກ້ບັນຫາດ້ານປະສິດທິພາບຂອງວັກຊີນທີ່ມີຢູ່ຊື່ງຄ່ອນຂ້າງມີປະສິດທິພາບຕ່ຳ ຄຳກ່າວຂອງເກົາຝູນັບເປັນຄັ້ງທຳອິດທີ່ເຈົ້າຫນ້າລະດັບສູງຂອງຈີນຍອມຮັບກັບສາທາລະນະຊົນວ່າວັກຊີນຂອງຈີນມີປະສິດທິພາບຕ່ຳ ໃນຂະນະທີ່ຈີນກຳລັງເດີນຫນ້າສີດວັກຊີນໃຫ້ປະຊາຊົນຂະຫນານໃຫ່ຍແລະສົ່ງອອກວັກຊີນທີ່ຜະລິດໄປທົ່ວໂລກ

ທ່ານເກົາຝູສະເຫນີແນະນຳວ່າ ຫົນທາງຫນື່ງທີ່ຈະແກ້ບັນຫາປະສິດທິພາບຂອງວັກຊີນຄື ເລືອກໃຊ້ວັກຊີນທີ່ຜະລິດຈາກເທັກໂນໂລຢີຕ່າງໆກັນຊື່ງວິທີນີ້ເປັນວິທີທົ່ວໂລກກຳລັງສຶກສາຢູ່ເຊັ່ນກັນ
ຜູ້ອຳນວຍການ CDC ກ່າວວ່າ ຜູ້ຊ່ຽວຊານບໍ່ຄວນລະເລີຍວັກຊີນທີ່ຜະລິດດ້ວຍເທັກໂນໂລຢີ mRNA ພຽງເພາະວ່າມີວັກຊີນຈາກເທັກໂນໂລຢີອື່ນໃນປະເທດຢູ່ແລ້ວ
ຂະນະນີ້ວັກຊີນຂອງຈີນທີ່ໄດ້ຮັບອະນຸຍາດໃຫ້ນຳມາໃຊ້ຍັງບໍ່ມີໂຕໃດທີ່ຜະລິດດ້ວຍເທັກໂນໂລຢີ mRNA ເລີຍ ມີພຽງວັກຊີນຂອງໄຟເຊີ/ໄບໂອເອັນເທັກ (Pfizer/ BioNTech) ແລະໂມເດີນາ (Moderna) ເທົ່ານັ້ນ
ຂະນະທີ່ວັກຊີນຂອງຈີນຍັງມີປະສິດທິພາບຕ່ຳເມື່ອທຽບກັບວັກຊີນເຈົ້າອື່ນ ໂດຍການທົດລອງໃນບຣາຊິລຂອງຊິໂນແວຄ (Sinovac) ມີປະສິດທິພາບພຽງ 50% ໃນການປ້ອງກັນການຕິດເຊື້ອ ແລະ 80% ໃນການປ້ອງກັນການຮຸນແຮງ ສ່ວນຂອງຊິໂນຟາຣມ (Sinopharm) ມີປະສິດທິພາບ 79.34% ແລະ 72.51% ຕາມລຳດັບ ແລະປະສິດທິພາບ ໂດຍລວມຂອງແຄນຊິໂນ (CanSino) ຢູ່ທີ່ 65.28% ຫລັງຈາກ 28 ວັນ