ກຳປູເຈຍ ປິດນະຄອນຫລວງພະນົມເປັນ 14 ວັນ ຄວບ​ຄຸມ​ໂຄ​ວິດ19

ຕາມ​ຂ່າວ​ຈາກ​ ກຳປູ​ເຈຍ, ທ່ານ ຮຸນ​​ເຊ​ນ,ນາຍົກລັດຖະມົນຕີ ກຳປູ​ເຈຍ ປະກາດ ​ປິດ​ນະຄອນຫລວງ ພະນົມ​ເປັນ ​ເປັນ​ເວລາ 14ວັນ ມີ​ຜົນ​ບັງຄັບ​ໃຊ້ ​ຕັ້ງແຕ່​ວັນ​ທີ15​-28 ​ເມສາປີ​ນີ້ ​ເພື່ອ​ຄວບ​ຄຸມ​ ການ​ແຜ່​ລະບາດ ​ໂຄ​ວິດ-19 ​ໂດຍລວມທັງ ​ເມືອງ​ຕາ​ເຂ​ມາ(Ta Khmau) ​ເປັນ​ເມືອງ​ໜຶ່ງ ​ໃນ​ແຂວງ​ກັນ​ດາລ (Kandal) ຢູ່​ຫ່າງ​ຈາກ​ ນະຄອນຫລວງ ​ພະນົມ​ເປັນ ​ໄປ​ທາງ​ໃຕ້​ ປະມານ 10ກິ​ໂລ​ແມັດ ​ໂດຍ​ຫ້າມ​ ປະຊາຊົນ ​ທຸກ​ຄົນ​ ອອກ​ຈາກ​ເຮືອນ ຖ້າບໍ່​ຈຳ​ເປັນ ຍົກ​ເວັ້ນ ສຳລັບ​ ຜູ້​ທີ່​ເດີນທາງ​ ໄປ​ເຮັດ​ວຽກ ຫລື​ ດຳ​ເນີນ ​ທຸລະ​ກິດ ​ແລະ ຕ້ອງ​ມີ​ໜັງສື​ ຮອງ​ຮັບ​ ຈາກ​ບໍລິສັດ ຫລື ໜ່ວຍ​ງານ​ທ້ອງ​ຖິ່ນ​ ຂອງ​ຜູ້​ເດີນທາງ.

 

ຂະນະ​ທີ່ ປະຊາຊົນ ສາມາດ​ ອອກ​ຈາກ​ເຮືອນ​ໄດ້ ດ້ວຍ​ເຫດ​ຜົນ​ ດ້ານ​ສຸຂະພາບ ຫລື​ ໃນ​ສະຖານະ​ການ ​ສຸກ​ເສີນ ​ແຕ່​ຕ້ອງ​ປະຕິບັດ​ ຕາມ​ມາດ​ຕະການ​ ຄວາມ​ປອດ​ໄພ ດ້ານ​ສາທາລະນະ​ສຸກ ​ໂດຍ​ສະ​ເພາະ ​ການ​ໃສ່​ຜ້າ​ອັດ​ປາກ ​ແລະ ຮັກສາ​ ໄລຍະ​ຫ່າງ ​ທາງ​ສັງຄົມ.ສ່ວນ​ກະຊວງ​ ສາທາລະນະ​ສຸກ ກຳປູ​ເຈຍ ລາຍ​ງານ ​ຜູ້​ເສຍ​ຊີວິດ​ ຈາກ​ໂຄ​ວິດ-19​ຈຳນວນ 36ຄົນ ​ແລະ ຜູ້​ຕິດ​ເຊື້ອ​ອີກ 177ຄົນ ​ເພີ່ມ​ສະຖິຕິ ​ສະ​ສົມ​ ຂອງ​ຜູ້​ຕິດ​ເຊື້ອ​ ໂຄ​ວິດ-19​ເກືອບ 5.000 ຄົນ​ແລ້ວ ​ໂດຍ 1 ​ໃນ3​ ຂອງ​ຜູ້​ຕິດ​ເຊື້ອ ​ໄດ້​ຮັບ​ການ​ຢືນຢັນ​ ພາຍ​ໃນ​ເວລາ​ ພຽງ​ເດືອນ​ດຽວ ​ແລະ ຍັງ​ມີ​ຜູ້​ເຂົ້າຮັບ​ການ​ປິ່ນປົວ​ ຢູ່​ໂຮງໝໍ2.500 ກວ່າ​ຄົນ