ກວດພົບຜູ້ຕິດເຊື້ອພະຍາດໂຄວິດ19 ເພີ່ມ 2ຄົນ.

ທ່ານ ດຣ. ພອນປະດິດ ສັງໄຊຍະລາດ ຫົວໜ້າສູນວິເຄາະ ແລະ ລະບາດວິທະຍາ ກະຊວງສາທາລະນະສຸກ, ຕາງໜ້າກອງເລຂາຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19, ຖະແຫລງຕໍ່ສື່ມວນຊົນ ຕອນທ່ຽງວັນທີ 20 ເມສາ 2021 ທີ່ກະຊວງສາທາລະນະສຸກ ເຖິງວຽກງານເກັບຕົວຢ່າງຊອກຫາເຊື້ອCOVID-19ຢູ່ ສປປ ລາວວ່າ: ວັນທີ 19 ເມສາ2021 ໄດ້ເກັບຕົວຢ່າງມາກວດວິເຄາະທັງໝົດ 456ຄົນ; ຜົນກວດວິເຄາະທັງໝົດແມ່ນພົບຜູ້ຕິດເຊື້ອໃໝ່ 2 ຄົນ,
ກໍລະນີທີ 59 ເປັນເພດຍິງ, ອາຍຸ: 25 ປີ, ສັນຊາດ: ລາວ, ອາຊີບ: ນັກສຶກສາ.
– ປະຈຸບັນຢູ່ບ້ານໂພນສະຫວ່າງ, ເມືອງຈັນທະບູລີ, ນະຄອນຫຼວງວຽງຈັນ.

ປະຫວັດການເຄື່ອນໄຫວ
ວັນທີ 6 ເມສາ 2021 ໝູ່ຂອງເອື້ອຍຮັກ 2 ຄົນ (ເພດຊາຍ) ລັກລອບຂີ່ເຮືອຂ້າມມາຈາກປະເທດໄທ ແລະ ເຂົ້າພັກຢູ່ ໂຮງແຮມສາຍແພໄໝ 2 ຢູ່ແຂວງສະຫັວນນະເຂດ ແລ້ວໄດ້ມາພົບເອື້ອຍຮັກ ຂອງຜູ້ກ່ຽວ, ທັງ 3 ຄົນ ໄດ້ໄປຮ້ອງຄາຣາໂອເກະ (ບໍ່ຊື່ຮ້ານ). ເວລາ 20:30 ໂມງ ຈຶ່ງໄດ້ຂຶ້ນລົດຈາກຄິວລົດແຂວງສະຫວັນນະເຂດ ມານະຄອນຫຼວງວຽງຈັນ.
ວັນທີ 7 ເມສາ 2021 ເວລາ 5:40 ໂມງເຊົ້າ ເດີນທາງມາຮອດນະຄອນຫຼວງວຽງຈັນ, ທັງ 3 ຄົນ ເດີນທາງໄປຮ້ານຄາຣາໂອເກະ 8118 ຕັ້ງຢູ່ບ້ານຮ່ອງໄກ່ແກ້ວ, ເມືອງຈັນທະບູລີ, ຫຼັງຈາກນັ້ນ ເຂົ້າພັກຢູ່ໂຮງແຮມເຈືອງ 2, ບ້ານສີບຸນເຮືອງ, ເມືອງຈັນທະບູລີ.

ວັນທີ 8 ເມສາ 2021 -ຜູ້ກ່ຽວ ໄດ້ຮັບທັງ 3 ຄົນຢູ່ໂຮງແຮມເຈືອງ2 ມາກິນເຂົ້າຢູ່ຮ້ານອາຫານFunny 89 ຕັ້ງຢູ່ບ້ານທ່າສະຫວ່າງ, ເມືອງໄຊທານີ, ນະຄອນຫຼວງວຽງຈັນ .
ວັນທີ 9 ເມສາ 2021 ຕອນແລງ ໄດ້ເດີນທາງໄປຮັບທັງ 3 ຄົນ ຢູ່ໂຮງແຮມເຈືອງ2 ໄປວັດສີເມືອງ, ເມືອງສີສັດຕະນາກ ແລະ ກັບໄປສົ່ງພວກກ່ຽວຢູ່ໂຮງແຮມຄືນ.
– ຫຼັງຈາກນັ້ນ ຜູ້ກ່ຽວ ເດີນທາງໄປຮຽນພາສາອັງກິດຢູ່ໂຮງຮຽນVientiane College.
– ຕອນຄໍ່າ ມາຮັບທັງ 3 ຄົນຢູ່ໂຮງແຮມ ມາກິນເຂົ້າຢູ່ຮ້ານອາຫານ Funny 89 ຈົນຮອດເວລາປິດຮ້ານ ແລະ ໄປສົ່ງພວກກ່ຽວຢູ່ໂຮງແຮມ.
ວັນທີ 11 ເມສາ 2021- ຕອນຄ່ຳ ຜູ້ກ່ຽວໄດ້ຮັບຂ່າວວ່າ ທັງ 3 ຄົນ ເດີນທາງໄປສະຖານທີ່ບັນເທິງWhatClub ແລະ ໄປຮ້ານຄາຣາໂອເກະ 8118.
ວັນທີ 12 ເມສາ 2021- ຕອນບ່າຍຜູ້ກ່ຽວພາທັງ 3 ຄົນໄປຮ້ານນວດ 111ຢູ່ບ້ານໜອງບອນ, ພາຍຫຼັງນວດແລ້ວ ໄດ້ພາກັນໄປກິນເຂົ້າປຽກໄກ່ຜູ້ໂອກຢູ່ໃນປ້ຳນ້ຳມັນສີບຸນເຮືຶອງ (ໃຊ້ເວລາ 1 ຊົ່ວໂມງ) ແລະ ກັບໄປສົ່ງທັງ 3 ຢູ່ໂຮງແຮມ.
– ຕອນຄ່ຳ ຜູ້ກ່ຽວ ແລະ ເອື້ອຍຮັກ ເດີນທາງໄປກິນປິ້ງປາໝຶກ ຢູ່ທ່ົງຂັນຄຳ, ຕໍ່ໜ້າສະຖານີດັບເພິງ, ເມືອງຈັນທະບູລີ.
ວັນທີ 13 ເມສາ 2021- ໝູ່ເອື້ອຍຮັກທັງ 2 ຄົນ ມີໄຂ້ ແລະ ເມື່ອຍ. ບໍ່ໄດ້ພົບກັບຜູ້ກ່ຽວ.

ວັນທີ 14-15 ເມສາ 2021 – ຜູ້ກ່ຽວຮູ້ສຶກເມື່ອຍ
ວັນທີ 16-17 ເມສາ 2021 – ທັງ 3 ຄົນ ອອກຈາກໂຮງແຮມ (ບໍ່ຮູ້ເດີນທາງດ້ວຍວິທີໃດ)ໄດ້ຂີີ່ລົດກາຍບ້ານ
ໝາກນາວ ມາຂຶ້ນເຮືອໄປທ່າບໍ່, ແຂວງໜອງຄາຍ, ປະເທດໄທ.
– ຜູ້ກ່ຽວໄດ້ຮັບໂທລະສັບວ່າ ທັງ 3 ຄົນ ຕິດເຊື້ອ COVID-19 ແລະ ໜຶ່ງໃນໝູ່ເອື້ອຍຮັກມີອາການໜັກ.
-ຜູ້ກ່ຽວເດີນທາງໄປກວດຢູ່ໂຮງໝໍລາວຫວຽດ ດ້ວຍອາການໄຂ້, ເມື່ອຍ, ຖອກທ້ອງ ແລະ ໄດ້ຢາຈຳນວນໜຶ່ງມາກິນຢູ່ບ້ານ ອາການດີຂຶ້ນ.
ວັນທີ 19 ເມສາ 2021- ເດີນທາງມາກິນເຂົ້າຢູ່ເຮືອນໝູ່ ມີ 3 ຄົນ (ລວມທັງຜູ້ກ່ຽວ).
-ຮູ້ສຶກອ່ອນເພຍຈຶ່ງໄດ້ມາກວດຢູ່ໂຮງໝໍມິດຕະພາບ, ຖືກເກັບຕົວຢ່າງ ແລະ ເຂົ້ານອນແຍກປ່ຽວ
-ຜົນກວດວິເຄາະ ແມ່ນພົບເຊື້ອ COVID-19
-ປະຈຸບັນ ເຂົ້ານອນແຍກປ່ຽວ, ຕິດຕາມອາການ ແລະ ຮັບການປິ່ນປົວຢູ່ໂຮງໝໍມິດຕະພາບ.

• ສຳລັບກຸ່ມສໍາຜັດໃກ້ຊິດ ໃນເບື້ອງຕົ້ນ ມີ 19 ຄົນ, ຄະນສະເພາະກິດໄດ້ເກັບຕົວຢ່າງມາກວດວິເຄາະ, ປະຈຸບັນ ແມ່ນຍັງລໍຖ້າຜົນກວດ. ພ້ອມດຽວກັນນັ້ນ ພວກເຮົາຍັງໄດ້ສືບຕໍ່ເຝົ້າລະວັງ, ຕິດຕາມອາການພວກກ່ຽວ ແລະ ຈຳກັດບໍລິເວນຜູ້ສຳຜັດໃກ້ຊິດຈົນຄົບ 14 ວັນ.
• ກໍລະນີຢັ້ງຢືນທີ 60 ເປັນ ເພດຍິງ, ອາຍຸ: 28 ປີ, ສັນຊາດ: ລາວ, ອາຊີບ: ແມ່ເຮືອນ
– ທີ່ຢູ່ປະຈຸບັນ: ບ້ານ ນາຊອນ, ເມືອງນາຊາຍທອງ, ນະຄອນຫຼວງວຽງຈັນ
ປະຫວັດການເຄື່ອນໄຫວ
ວັນທີ 7 ເມສາ 2021- ເສີມດັງຢູ່ກຸງເທບ
ວັນທີ 8-9 ເມສາ 2021- ບໍ່ໄດ້ເດີນທາງໄປໃສ
ວັນທີ 10 ເມສາ 2021 – ມີໄຂ້, ເຈັບຄໍ, ໄອ ແລະ ຖ່າຍແຫຼວເປັນມູກ
ວັນທີ 11-17 ເມສາ 2021- ບໍ່ໄດ້ເດີນທາງໄປໃສ

ວັນທີ 18 ເມສາ 2021- ຂຶ້ນລົດແທັກຊີຈາກກຸງເທບ ມາຮອດ ໜອງຄາຍ, ຫຼັງຈາກນັ້ນ ມີຄົນໄທຕິດຕໍ່ຜູ້ຂັບເຮືອ ໃຫ້ມາສົ່ງຢູ່ຝັ່ງລາວ ແລະ ມີລົດມາສົ່ງຜູ້ກ່ຽວຢູ່ທ່າເຮືອ.
ວັນທີ 19 ເມສາ 2021- ຂ້າມເຮືອນ້ອຍມາຮອດຝັ່ງລາວ ຢູ່ເຂດເກົ້າລ້ຽວ, ເມືອງສີໂຄດຕະບອງ, ມີລົດຮູນໃດ ມາຮັບເອົາຜູ້ກ່ຽວ.
– ຈາກນັ້ນ ຜູ້ກ່ຽວແວ່ໄປຫາໝູ່ຢູ່ເຂດຊ້າງສາມຫົວ.
– ຈ້າງລົດຕຸກໆ ໄປກວດຢູ່ໂຮງໝໍມະໂຫສົດ ເພື່ອຂໍກວດຊອກຫາ COVID-19, ແພດແນະນຳໃຫ້ໄປກວດຢູ່ໂຮງໝໍມິດຕະພາບ. ເມື່ອມາຮອດໂຮງໝໍມິດຕະພາບໄດ້ຖືກເກັບຕົວຢ່າງກວດ.
ວັນທີ 20 ເມສາ 2021 – ຜົນກວດວິເຄາະ ພົບເຊື້ອ COVID-19

-ປະຈຸບັນ ເຂົ້ານອນແຍກປ່ຽວ, ຕິດຕາມອາການ ແລະ ຮັບການປິ່ນປົວຢູ່ໂຮງໝໍມິດຕະພາບ.
• ສຳລັບກຸ່ມສໍາຜັດໃກ້ຊິດ ໃນເບື້ອງຕົ້ນ ມີ 4 ຄົນ, ຄະນະສະເພາະກິດໄດ້ເກັບຕົວຢ່າງມາກວດວິເຄາະ, ປະຈຸບັນ ແມ່ນຍັງລໍຖ້າຜົນກວດ. ພ້ອມດຽວກັນນັ້ນ ພວກເຮົາຍັງໄດ້ສືບຕໍ່ເຝົ້າລະວັງ, ຕິດຕາມອາການພວກກ່ຽວ ແລະ ຈຳກັດບໍລິເວນຜູ້ສຳຜັດໃກ້ຊິດຈົນຄົບ 14 ວັນ.
ສັງລວມການເກັບຕົວຢ່າງກວດວິເຄາະ ນັບແຕ່ເດືອນມັງກອນ 2020 ຮອດປະຈຸບັນ ມີທັງໝົດ 148,745 ຕົວຢ່າງ, ໃນນັ້ນ ກວດພົບເຊື້ອສະສົມ 60 ຄົນ.
ການຕິດຕາມປີ່ນປົວຄົນເຈັບຢູ່ໂຮງໝໍ

•ປະຈຸບັນ, ຄົນເຈັບຕິດເຊື້ອໂຄວິດ-19ຍັງນອນຕິດຕາມປິ່ນປົວຢູ່ສະຖານທີ່ປິ່ນປົວທີ່ແຂວງກຳນົດໄວ້ຈຳນວນ 11ຄົນ (ໃໝ່ 2), ໃນນັ້ນ:
-ຢູ່ນະຄອນຫຼວງວຽງຈັນ 5 ຄົນ (ໂຮງໝໍມິດຕະພາບ)
– ແຂວງຈຳປາສັກ 1 ຄົນ
– ແຂວງສາລະວັນ 1 ຄົນ
– ແຂວງສະຫວັນນະເຂດ 2 ຄົນ
– ແຂວງຄໍາມ່ວນ 1 ຄົນ
– ແຂວງບໍລິຄໍາໄຊ 1 ຄົນ (ສູນປິ່ນປົວຫຼັກ 6) ທຸກຄົນ ແມ່ນມີສຸຂະພາບຮ່າງກາຍຈິດໃຈສົມບຸນ ແລະແຂງແຮງດີ.