ຫມາກລີ້ນໄມ້ ເຮັດ​ໃຫ້​ຮ່າງ­ກາຍ​ມີ​ຄວາມ​ແຂງ­ແຮງ ສາ­ມາດ​ຕ້ານ​ພະ­ຍາດ​ເບົາ­ຫວານ​ໄດ້

ເປັນໄມ້ຢືນຕົ້ນຂະໜາດນ້ອຍ ສູງ 5-10 ມ, ແຕກກີ່ງງ່າ ຫຼື ບາງຕົ້ນບໍ່ມີງ່າ. ໃບຈັບກົງກັນຂ້າມ, ເປັນໃບປະສົມແບບຂົນນົກ 2-4 ຊັ້ນ, ແຜ່ນໃບຮູບສາມຫຼ່ຽມ-ຮູບໄຂ່, ກ້ຽງ, ບາງເມື່ອແຫ້ງ, ໂຄນໃບມົນ, ບ້ຽວ, ຂອບລຽບ. ຊໍ່ດອກຕັ້ງຊື່, ເກີດທີ່ປາຍຍອດ, ກາບດອກມີຂະໜາດໃຫຍ່, ສີມ່ວງ, ຫຼື ເປັນຮູບລຳໂພງ. ກິບດອກສີມ່ວງປົນສີແດງ ຫຼື ສີເຫຼືອງ, ແສກປາກມີສອງແສກ, ສີຂົນຢູ່ໃກ້ໂຄນດອກ. ເກສອນຜູ້ມີ 5 ອັນເທົ່າກັນ, ເປັນທໍ່ຍາວ, ຮວງຮັບເປັນຮູບລີ້ນ, ແປ. ໝາກແຫ້ງແລ້ວແຕກ, ເປືອກແຂງ, ຂອບເປັນນູນ. ແກ່ນມົນ, ມີປີກເປັນເຈ້ຍບາງ.

ເປືອກ, ໃບ, ຮາກ, ເປືອກຮາກ, ໝາກ ແລະ ແກ່ນ ໃຊ້ເປັນຢາປີ່ນປົ່ວງູກັດ.
1) ເປືອກ: ຕົ້ມເປືອກດື່ມນ້ຳເພື່ອຮັກສາພະຍາດບາດແຜໃນກະເພາະອາຫານ ແລະ ທາດຈາກເປືອກສາມາດໃຊ້ເປັນຢາປົວມະເຮັງປາກ, ຫິດ ແລະ ພະຍາດຜີວໜັງອື່ນໆ. ນ້ຳຄັ້ນຈາກເປືອກໃຊ້ເປັນຢາຊູກຳລັງ ແລະ ຮັກສາບາດແຜທີ່ມີປະໂຫຍດໃນການຮັກສາອາການຖອກທ້ອງ, ປະດົງຂໍ້ ແລະ ພະຍາດອັບເສັບ.

2) ຮາກ: ນຳໃຊ້ເປັນຢາປົ່ວອັບເສັບ, ຮັກສາມົດລູກ, ຮັກສາເສັ້ນປະສາດ, ຮັກສາອາການໄຂ້, ໄອ, ຮັກສາພະຍາດເບື່ອອາຫານ, ຮັກສາອາການຖອກທ້ອງ, ຮັກສາພະຍາດເບົາຫວານ ແລະ ອື່ນໆ.

3) ເປືອກຮາກ:ນຳໃຊ້ເປັນຢາຮັກສາບາດແຜ, ຮັກສາອາການເຈັບກະເພາະອາຫານ, ລົດຄວາມຕຸ້ຍ, ສາມາດຮັກສາອາການເຈັບທ້ອງ.
4) ໃບ: ສາມາດຮັກສາອາການອັກເສບທາງພາຍນອກ, ເຈັບຫົວ ແລະ ບາດແຜ ແລະ ຍັງມີການນຳໃຊ້ຈັບປວດກ້າມຊີ້ນ ແລະ ຮັກສາແມງໄມ້ກັດ
5) ໝາກ: ສາມາດຮັກສາຂັບຂີ້ກະເທີ, ຂັບລົມໃນກະເພາະອາຫານ ແລະ ມີປະໂຫຍດໃນການແກ້ໄອຫລອດລົມອັບເສບ, ຮັກສາອາການອາຫານບໍ່ຍ່ອຍ, ທ້ອງບິດ, ທ້ອງເຟີ, ຮັກສາເດັກມັກຮ້ອງໃຫ້ຕອນກາງຄືນ ແລະ ພະຍາດຜິວໜັງ.
6) ແກ່ນ: ໃຊ້ເປັນຢາລະບາຍ

ໝາກ​ລີ້ນ­ໄມ້ ມີ​ລົດ​ຊາດ​ຂົມ ແລະ ມີ​ຄຸນ​ປະ­ໂຫຍດ​ເປັນ​ຢາ­ພື້ນ­ເມືອງ ເຮັດ​ໃຫ້​ຮ່າງ­ກາຍ​ມີ​ຄວາມ​ແຂງ­ແຮງ ສາ­ມາດ​ຕ້ານ​ພະ­ຍາດ​ເບົາ­ຫວານ​ໄດ້​ຄື​ກັບ​ໝາກ​ໄມ້​ທີ່​ມີ​ລົດ​ຊາດ​ຂົມ​ທົ່ວ​ໄປ ຊ່ວຍ​ຮັກ­ສາ​ເຊວ​ຕ່າງໆ​ໄດ້​ດີ ມີ​ຄວາມ​ແຂງ­ແຮງ ແລະ ສາ­ມາດ​ຊ່ວຍ​ຕ້ານ​ພະ­ຍາດ​ມະ​ເຮັງ ນອກ​ນີ້ ໝາກ​ລີ້ນ­ໄມ້ ໃຫ້​ຄຸນ​ປະ­ໂຫຍດ​ຊ່ວຍ​ຕ່ຳ​ຮ່າງ­ກາຍ ຄື: ຊ່ວຍ​ຫຼຸດ​ລະ­ດັບ​ຄໍ​ເລດ​ເຕີ​ລໍ​ໃນ​ເລືອດ​ໄດ້ ຊ່ວຍ​ບຳ­ລຸງ​ເລືອດ ແລະ ຊ່ວຍ​ເພີ່ມ​ການ​ໄຫຼ​ວຽນ​ຂອງ​ເລືອດ ຊ່ວຍ​ເຮັດ​ໃຫ້​ຮ່າງ­ກາຍ​ອົບ​ອຸ່ນ ແລະ ຫຼຸດ​ຮ້ອນ​ໃນ ຊ່ວຍ​ຕ້ານ​ອະ­ນຸ​ມູນ​ອິດ​ສະ­ລະ​ໃນ​ຮ່າງ­ກາຍ ຊ່ວຍ​ຢຸດ​ຢັ້ງ​ການ​ເສື່ອມ​ຂອງ​ເຊວ​ຕ່າງໆ​ໃນ​ຮ່າງ­ກາຍ ຊ່ວຍ​ຫຼຸດ​ຄວາມ​ສ່ຽງ​ຂອງ​ການ​ເກີດ​ພະ­ຍາດ​ມະ​ເຮັງ ແລະ ຊ່ວຍ​ຕ້ານ​ມະ​ເຮັງ ຊ່ວຍ​ປິ່ນ­ປົວ ແລະ ຕ້ານ​ພະ­ຍາດ​ເບົາ­ຫວານ ຊ່ວຍ​ບຳ­ລຸງ​ກະ­ເພາະ ຕັບ ແລະ ປອດ ຊ່ວຍ​ຂັບ​ລົມ​ໃນ​ລຳ​ໄສ້ ໃຊ້​ເປັນ​ຢາ​ຂັບ​ຖ່າຍ ລະ­ບາຍ​ທ້ອງ ຊ່ວຍ​ຂັບ​ນ້ຳ​ຄາວ​ປາ​ໃຫ້​ມົດ​ລູກ​ເຂົ້າ​ອູ່​ໄວ​ຂຶ້ນ ແຕ່​ສິ່ງ​ທີ່​ຄວນ​ເອົາ­ໃຈ­ໃສ່ ຄື: ຜູ້­ຍິງ​ຖື­ພາ​ບໍ່​ຄວນ​ກິນ​ໝາກ​ລີ້ນ­ໄມ້ ເພາະ​ອາດ​ເຮັດ​ໃຫ້​ແທ້ງ​ລູກ​ໄດ້ ເນື່ອງ​ຈາກ​ໝາກ​ລິ້ນ​ໄມ້​ມີ​ລິດ​ເຮັດ​ໃຫ້​ເກີດ​ອາ­ການ​ຮ້ອນ​ຫຼາຍ